اسئلة شائعة

                             بسم الله الرحمن الرحيم

                               >>>>>> أسئلة متنوعة :-<<<<<<

1 – هل يجوز التقديم بعد مضي اكثر من سنة علي التخرج من الثانوية ؟
* لا يجوز .

2 – هل يشترط النجاح ف السنة الاولي بالجامعة لكي اتقدم ؟
* يشترط النجاح بتقدير للمقيدين بكليات ومعاهد ولو شايل مادة او اتنين بس مكتوبلك ناجح وبتقدير عادي تقدر تقدم .

3 – ينفع اقدم وجدودي او الابوين مش مصريين او واخدين الجنسية عن طريق التجنس ؟
*لا يجوز .

4 – هل انا ملزم بتقديم الملف في الميعاد المحدد ؟
* لا انت غير ملزم بتقديمه في الميعاد المحدد بشرط ألا تتجاوز الحد الاقصي وهو 14/8 .

5 – هل في تقديم شرطة وحربية للبنات بعد الثانوية ؟
* لأ البنات ملهمش تقديم الا بعد الجامعة يعني يقدموا ظباط متخصصين . لكن بعد الثانوية ملهمش غير معهد فني تمريض فقط .

6 – هل انا بختار الكلية بمزاجي او بكتب رغبات ؟
* لا انت بتقدم ف مكتب التنسيق هو ملف واحد لكل الكليات ولما بتسلمه بيرشحوك للكلية المناسبة حسب الطول والشعبة والمجموع يعني مش بتختار الكلية بمزاجك .

7 – اروح الكلية الحربية ازاي ؟
* المواصلات من ميدان رمسيس تركب الكلية الحربية مكتب التنسيق ده للى هيشتروا الملف .
اما وقت تسليم الملف بيكون من باب استاد الكلية الحربية .
او تركب مترو خط العتبة – العباسية هتطلع من محطة مترو العباسية هتلاقى مكروباصات بتودى الكلية الحربية .

8 – لو انا عملت اعادة تصحيح ف نتيجة الثانوية وعايز اضيف الدرجة الجديدة ف الملف اعمل ايه ؟
* هتجيب شهادة الثانوية الجديدة اللي هتستلمها في حالة حصولك ع درجات من اعادة التصحيح + الشهادة الاصلية قبل تعديل الدرجات وتقدمهم لمكتب التنسيق .

9 – لو الثانوية بتاعتي من الخارج اعمل ايه ؟
* بتقدم الشهادة للمجلس الأعلي للجامعات لمعادلة المجموع والنسبة المئوية واحضار الشهادة لمكتب التنسيق بعد اتمام معادلتها .

10 – لو عندي دور ثاني ف المواد اعمل ايه ؟
* هتبلغ الظابط المختص لما تسلم الملف وهتجيب الشهادة بعد النجاح ف الدور الثاني تقدمها قبل الهيئة .

11 – القيد العائلي استخرجه منين وازاي ؟
* القيد العائلي من السجل المدني بتقدم صورة بطاقة الوالد + صورة بطاقة الوالدة + وثيقة الزواج كمبيوتر (أو الطلاق في حالة الطلاق) + صورة بطاقتك انت واخواتك ولو اخ ملوش بطاقة بتقدم صورة شهادة ميلاده (ولو في فرد من الاسرة متوفي بتقدم صورة شهادة وفاته) .
لما بيطلع القيد العائلي هتلاقي ف ضهر الورقة مكان يمضي عليه صاحب القيد اللي هو والدك مش انت اللي تمضي ركزوا معايا القيد بيكون باسم الاب لانه رب الاسرة .

12 – القيد للجدين اطلعه منين وازاي ؟
* من السجل المدني بتقدم للقيد بتاع الجد للوالد صورة شهادة الميلاد للجد (أو الوفاة في حالة الوفاة) + صورة شهادة ميلاد زوجة الجد (أو الوفاة في حالة الوفاة) + صورة قسيمة الزواج كمبيوتر (أو الطلاق في حالة الطلاق) + صور شهادات ميلاد الأبناء يعني اعمامك وعماتك بما فيهم والدك (أو الوفاة في حالة الوفاة) .
* القيد بتاع الجد للأم صورة شهادة الميلاد للجد (أو الوفاة في حالة الوفاة) + صورة شهادة ميلاد زوجة الجد (أو الوفاة في حالة الوفاة) + صورة قسيمة الزواج كمبيوتر (أو الطلاق في حالة الطلاق) + صور شهادات ميلاد الأبناء يعني اخوالك وخالاتك بما فيهم والدتك (أو الوفاة في حالة الوفاة) .

13 – اقدم الملف امتي لو مش مكتوب معاد التقديم ؟
قدمه بعد سحبك للملف ب 15 كحد ادني وقبل 14/8 كحد اقصي .

14 – هل السباحة شرط أساسي ؟
* السباحة اجباري في الكلية البحرية أما باقي الكليات اختياري بس خد بالك السباحة 20 درجة في الرياضي يعني ممكن تفرق معاك لو انت مقصر ف حاجة تانية .

15 – المقاس بتاع سحب الملف معتد به ؟
* لا ده بيكون قياس مبدئي ملوش لازمة المهم القياس بتاع اول يوم طبي .

>>>>>>تاسعاً وأخيراً : ملاحظات هامة جداً جداً جداً :-<<<<<<

1 – رقم القيد بتستلمه يوم ما تسلم الملف .
2 – كارت التردد يكون معاك ف كل اختبار وبطاقتك اوعي تنساهم والا مش هتخش الاختبار .
3 – ممنوع التخلف عن موعد الاختبار لأي سبب كان .
4 – ف الطبي لازم تكون حالق شعرك ع درجة 1 وحالق سوالفك ودقنك واللازي منه (احم احم) . وتكون لابس سلب ابيض شكل 7 ممنوع تلبس بوكسر او شورت الكلام واضح .
5 – اول يوم طبي تاخد معاك قلم جاف عشان هتملا شوية بيانات .
6 – يوم الرياضي تروح بلبس رياضي .
7 – ف الهيئة ان شاء الله ربنا يوعدنا كدة تروح بقميص ابيض نص كم وبنطلون اسود وشراب وجزمة سودا .
8 – ازاي تعرف ان وزنك مناسب ؟
* بص يا سيدي الوزن يكون متناسب مع الطول بالزيادة والنقصان 10 كيلو يعني لو طولك 170 يبقا الوزن المناسب ما بين 60 ل 80 ولو طولك 180 يبقا الوزن المناسب ما بين 70 ل 90 وهكذا .
9 – اللي عايز يزود وزن عليك وعلي الحلويات والمعجنات والمخبوزات والبيبسي والشوكولاتة خصوصا قبل ما توزن عاوزك تضرب كيلو بسبوسة ولتر بيبسي واوعي تخش الحمام وتروح توزن ع كدة هتلاقي وزنك ضارب  .
10 – اللي عايز يخس يجري كل يوم ع الريق مش اقل من نص ساعة وميشربش مياة كتير ف الوجبات ومتطفحش كتير ع الفطار وياريت لو تنزل لكابتن جيم يخسسك بس لو راجل استحمل  .
11 – صور كل الاوراق اللي هتحطها ف الملف عشان هتحطهم ف ملف المرحلة الثانية بعد الطبي ان شاء الله .